Anay barangay kagawad sa Bakhaw, Mandurriao, dakup sa buy bust operation

Iloilo City — Dakup ang anay barangay kagawad sang Bakhaw, Mandurriao sa drug buy bust operation nga ginhimo sang City Drug Enforcement Unit kag Mandurriao police kagab-i, Agosto 4.

Ginkilala ang nadakpan kay anay barangay kagawad Matthew Miranda nga nangin kagawad sa Bakhaw halin 2010 tubtob 2013.

Suno kay SPO1 Alfred Atilano sang CDEU, nakuha sa balay ni Miranda ang 26 ka sachets sang suspected shabu nga ginabanta nagalab-ut sa 100 mil pesos ang street value kag mga drug paraphernalia.

Posible suno kay Atilano nga madugay na nga involved si Miranda sa illegal drugs pero ulihi nahibaluan bangud may front ini nga negosyo sang mga trucking.

Magluwas kay Miranda, dakup man bangud natabuan sa balay sini ang duha ka menor de edad kag sanday Jerwin Locsin, 22 anyos, kag John Rey Abello, 18 anyos sang Tanza Baybay, City Proper. Nagbalibad nga magkomento si Miranda. (JoMaque)