Mga suldado kag ginapatihan mga rebelde, nag-engkuwentrohanay sa Cabatangan, Lambunao
Lambunao, Iloilo — Nakabaton sang impormasyon ang Lambunao police nga may nagluntad nga encounter sa tunga sang mga katapo sang 61st Infantry Battalion kag ginapatihan mga rebelde sa Brgy. Cabatangan las 5:35 kaina sang aga, Agosto 5.
Suno kay Chief Inspector Jogen Suegay, hepe sang Lambunao Police Station, wala pa siya sang ideya kon pila ka mga ginapatihan rebelde ang naka-engkuwentro sang mga suldado.
Nagapakig-angut na ang Lambunao police sa ila counterpart sa Philippine Army angut sa impormasyon.
Base naman sa Police Regional Office 6, gin-harass sang Communist Party of the Philippines -New Peoples Army ang detachment sang 61st Infantry Battalion sang Philippine Army sa amo nga lugar 5:35 kaina sang aga.
Gilayon nga nagpatrol ang mga soldado upod sa Civilian Armed Forces Geographical Unit ukon CAFGU batuk sa mga miembro sang CPP NPA las 6:00 kaina sang aga.
Wala sang casualty ukon pilason sa bahin sang gobyerno base sa inisyal nga impormasyon. Wala man sang report kun may casualty ukon pilason sa bahin sang mga rebelde.
Ginakuhaan sang Aksyon Radyo Iloilo sang pahayag ang Philippine Army apang wala pa sila nakasabat. Wala pa man nakahatag sang pahayag ang CPP-NPA kasunod sang insidente. (JoMaque)