Concern sa wala gihapon natapos nga 4.2 billion peso housing project para sa mga personnel sang AFP, PNP, BFP kag BJMP sa Barotac Nuevo, imbestigaran sang Sangguniang Panlalawigan
Iloilo–Kanugon sang gasto sang gobyerno sa housing project para sa mga katapo sang Armed Forces of the Philippines, Philippine National Police, Bureau of Jail Management and Penology kag Bureau of Fire Protection sa Barangay Cruz, Barotac Nuevo bangud wala gihapon natapos ang proyekto.
Ginpatawag sang Committee on Housing sang Sangguniang Panlalawigan ang representative sang National Housing Authority sa rehiyon agud pangayuan sang paathag sa wala pa natapos nga 4.2 billion pesos nga balor sang housing project. Suno kay 4th District Board Member Domingo Oso, limitado nga impormasyon lang ang ila nakuha kay Rhodora Lim nga Estate Supervisor sang NHA 6 bangud proyekto sang NHA central office ang ginapatindog.
1,050 ka units ang ginapatindog suno kay Oso nga 2012 pa ginsuguran kag 2013 dapat matapos apang madamo gihapon ang wala nakumpleto tubtob subong kag ginpahayag nga wala pa naturn-over ang contractor nga HG-3 Construction ang nahuman nga units. Nakita man nga kulang sa amenities ang housing project pareho sang tubig kag suga.
Plano sang Committee on Housing nga mangayo sang kaathagan sa NHA central office kag ipatawag man ang punong barangay sang Barangay Cruz, Barotac Nuevo kon maghimo sang committee hearing. (AGB)