Anay Iloilo City Councilor Jamjam Baronda, nagdeklarar nga mapadalagan nga kongresista sa syudad sa 2019 elections; Baronda, magasuporta kay Congressman Jerry Treñas bilang mayor

Iloilo City–Nagdeklarar sang iya kandidatura sa pagka-kongresista sang syudad sa 2019 elections si former City Councilor Jamjam Baronda.

Ginconfirmar ni Baronda nga nadesisyunan niya ang magpadalagan nga kongresista bangud maathag naman nga indi magbalikay ang maayo nga pagtamdanay sang magbilas nga Congressman Jerry Treñas kag Mayor Joe Espinosa. Si Treñas ang mapadalagan nga mayor bunggo kay Espinosa.

Nagpasalig si Baronda nga suportahan si Treñas kag kumpiyansa nga siya ang piliun sini sa iya linyada. Nagbalibad pa si Baronda sa pagbuyagyag kon ano ang iya mangin partido.

Nakaplastar naman sang iya mga himuon si Baronda kon mapilian nga kongresista.

Suno sa anay konsehal, pila lang sa iya mga programa ang pagpanami sang West Visayas State University Medical Center kag Western Visayas Medical Center, medical assistance sa mga pigado, pagpangita sang solusyon sa masami nga pagbaha kag pag-away sa illegal drugs. (AGB)