59 ka mga badjao, nagbiyahe na pabalik sa Mindanao

Iloilo City — Nagbiyahe na ang 59 ka Badjao nga natipon sang Public Safety and Transportation Office pabalik sa Mindanao.

Alas-2 kaina sang kaagahon, naglakat ang barko halin sa syudad kag magadungka sa Cagayan de Oro City karon sa hapon. Suno kay PSTMO Head Jeck Conlu, nag-upod sa mga Badjao ang taga-Philippine Coast Guard.

Pag-abot karon sa Cagayan de Oro, pagasal-on ang mga Badjao sang CSWDO kag DSWD personnel kag pasakyon sa bus para sa 14 oras nga biyahe pakadto sa Zamboanga City. Halin sa Zamboanga, pasakyon ang mga ini sa ferry pabalik na sa Jolo, Sulu sa diin nagahulat ang ila local government unit.

2 mil pesos (P2,000) suno kay Conlu ang gin-aprubahan nga budget sa kada Badjao kag nagbulig man ang pribado nga mga tawo.

Sa 59 nga nagpauli, 32 ang adults; 13 ang naga-edad pito ka tuig tubtob 17 anyos kag 14 ang naga-edad anum ka tuig panubo. (JoMaque)