Mga mapadalagan sa midterm elections, ginpanugyanan ni Comelec 6 Director Dennis Ausan nga magkuha sang kopya sang guidelines sa pagfile sang certificate of candidacy

Comelec 6, Iloilo City–Ginpanugyanan ni Commission on Elections (Comelec) 6 Director Dennis Ausan ang mga luyag magkandidato sa 2019 elections nga mag-secure sang kopya sang Comelec Resolution 10420 ukon ang guidelines sa pag-file sang certificate of candidacy.

Katuyuan sini suno kay Ausan nga mabasa sang maayo sang mga kandidato ang mga pagsulundan agud magiyahan sila sa pag-file sang COC.

Ginpahayag sini nga may mga kandidato nga wala naathagan sa pagsulundan gani puwede sila makapamangkot sa Comelec officers agud magiyahan sa pag-fill up sang COC. Ginhalimbawa ni Ausan nga indi pa gid maathag ang pag-limit sa number of characters sang ngalan sang kandidato nga luyag nila nga ibutang sa official ballot.

Kinahanglan man nga magiyahan sa ila mga hayo kag ang puwede nga mabutang nga apelyido sang mga married female candidates.

Gintalana ang COC filing sa Oktubre 1 tubtub Oktubre 5 halin alas-8 sa aga tubtub alas-5 sa hapon kag wala na sang time extension suno kay Ausan. (AGB)