Duterte administration, posible apektado sa isyu kay Senador Antonio Trillanes suno sa Ilonggo nga abogado

Iloilo City–Posible nga apektado ang Duterte administration sa issue kay Senator Antonio Trillanes IV gani nagdesisyon ang presidente nga maghimo sang Q and A upod kay Presidential Legal Counsel Salvador Panelo.

Ini ang pagtan-aw ni Atty. Hans Sayno sa nangin desisyon sang pangulo matapos ginkansela ang iya nga ‘address to the nation’ kahapon, Setyembre 11. Posible suno kay Sayno nga napilitan si Duterte nga maghimo sang Q&A bangud sang iban pa nga issue sa pungsod pareho sang pagtaas sang inflation rate kag pagmahal sang mga produktong petrolyo, bugas kag iban pa nga balaklon.

Wala naman suno sa iya napa-athag ni Duterte ang mga remedies ukon mga dapat himuon sang gobyerno agud mapakalma ang publiko sa mga nagapanguna nga problema sang pungsod.

Kon si Sayno ang pamangkuton, mas maayo suno sa iya nga nag-speech si Duterte sa baylo sang Q&A agud indi magguwa nga daw scripted ang iya pagsabat sa mga pamangkot ni Atty. Panelo. (AGB)