(UPDATE) RDEU head, nagpa-athag sa reklamo sang abogado nga wala ginpasulod sa balay sang iya kliyente sa buy bust operation sa Jaro kagab-i

Iloilo City–Nagpa-athag ang Regional Drug Enforcement Unit sa reklamo sang nagpakilala nga abogado sang pamilya Soliva nga wala ini ginpasulod sa balay kasunod sang buy bust operation sa Brgy. Quintin Salas, Jaro kagab-i, Setyembre 13.

Suno kay RDEU head PSI Kennith Bermejo, si alyas Shiela nga himata sang subject nga si Clint Soliva ang naghambal nga indi anay pagpasudlon sa ila balay ang mga katapo sang media kag ang abogado nga si Atty. Modesto Mamon.

Ginpabutyag suno sa iya ni Shiela nga indi man sila tanan involved sa sulod sang balay gani nag-advise ini nga wala sang media kag abogado agud matapos ang imbentaryo sang mga recoveries. May nakita man nga video si Bermejo nga nagapakita nga nag-atubangay si Shiela kag ang abogado.

Sa pagkamatuod, naghambal man si Bermejo kay shiela nga pasudlon si Mamon kon abogado gid man ini sang ila pamilya apang ini mismo ang wala nagpasugot. (AGB)