Ginapatihan drug personality, gintiro patay sa San Remigio, Antique

Antique — Patay ang ginapatihan drug personality sang gintiro sang lalaki nga nakasakay sa motorsiklo sa Brgy. Cadolonan, San Remigio, alas 8 kagab-i (Setyembre 16).

Ginkilala ni PO1 Sherwin Puyong sang San Remigio Police Station, ang biktima kay Edson Naquita sang Brgy. San Juan, Sibalom apang temporaryo nga naga-istar sa Funda-Dalipe, San Jose.

Suno kay PO1 Puyong, nagapauli ang biktima sa iya boarding house sa San Jose sang ginpahayag ginsundan sang duha ka suspek nga sakay sa duha ka motorsiklo.

Ginpahayag nga ginpanaugan sang isa ka suspek ang biktima kag gintiro.

Gindala pa sa ospital si Naquita apang gindeklarar nga napatay bangud sang duha ka pilas sa wala nga parte sang iya dughan.

Sa pagpangusisa sang San Remigio police, drug personality sa Sibalom si Naquita kag wala naka-surrender sa Oplan Tokhang.

Nakaluwas naman ang live-in partner ni Naquita nga si Glenda Hillado, 27-anyos sang La Carlota, Negros Occidental kag ang walo ka tuig nga utod nga babaye ni Naquita.

Narecover sa crime scene ang duha ka empty shells sang ginapatihan caliber 40.

Padayon ang imbestigasyon sang San Remigio police sa identity sang mga suspetsado kag motibo sa krimen. (JoMaque)