Mga ginikanan, ginpanugyanan ni IPPO director Marlon Tayaba nga bantayan ang ila kabataan kasunod sa pagdakup sa Australian nga naga-engage sa cyber pornography gamit ang mga menor-de-edad

IPPO headquarters, Sta. Barbara, Iloilo–Na-alarma si Iloilo Police Provincial Office ukon IPPO Director PSSUPT Marlon Tayaba sang nadiskubrihan ang modus sang Australian national kag karelasyon sini nga Pinay angut sa cyber pornography operation gamit ang mga menor-de-edad.

Napasakaan na sang anum ka kaso John Laffler, 69 anyos, kag duha  ka kaso ang iya kapartner nga si Gladys Degala,  21 anyos sang Bakhaw, Manduriao. Nadakpan ang duha sang ginserbihan sang search warrant sa isa ka subdivision sa Pavia sang Setyembre 15.

Suno kay Tayaba, dapat mangin mabinantayon ang mga ginikanan sa ila kabataan ilabi na sa mga menor nga madali mahaylo sang kwarta.

Sandig sa imbestigasyon, ginahire bilang modelo ang mga menor-de-edad kag sa ulihi, ginakuhaan sang hublas nga litrato kag ibaligya kag kuhaan sang komisyon.

Ginabaligya suno kay Tayaba sang P5,000 ang litrato nga hublas samtang P3,000 ang ginahatag sa kabataan.

May taga-Jaro, Oton, Tigbauan kag Antique nga mga modelo ang duha ka arestado suno sa IPPO. (AGB)