AUSTRALIAN NATIONAL KAG KA-RELASYON NGA PINAY, GINKASUHAN NA ANGUT SA CYBER CHILD PORNOGRAPHY
Iloilo–(UPDATE) Anum ka kaso may kaangtanan sa pagbaligya sang hublas nga pictures sang mga menor de edad ang ginpasaka sang Women and Children’s Protection Desk sang Iloilo Police Provincial Office batok sa Australia national nga si John Laffler, 69-anyos.
Gin-aresto kag ginkasuhan man ang ka-partner ni Laffler nga si Gladys Degala, 21-anyos sang Bakhaw, Mandurriao sang kaso angut sa Cyber Child Pornography.
Ang duha gindakop sang Setyembre 15 sa Pavia.
Ginpahayag ni IPPO Director Marlon Tayaba nga P5,000 ang pinakamanubo nga presyo sang ginabaligya nga litrato sang mga nadakpan, P3,000 dire ang nagakadto sa menor de edad nga ginahimo nila model.
Ang mga minors ginpahayag naghalin sa Antique, Tigbauan, Oton kag Jaro.
Ginpahayag ni Tayaba nga pila sa mga minor nga ginagamit nga modelo sang mag-business partner ang naga-edad sang 13, 14 kag 16 anyos base sa ila profiles.
Ginserbihan sang search warrant sang IPPO kag ginsulod ang balay nga ginadayunan sang duha sa subdivision sa Pavia matapos nakabaton sang impormasyon sa ila illegal nga negosyo.
Ginpabutyag ni Tayaba nga duha na ka tuig nga nagatiner sa Iloilo si Laffler kag siya ang nagatudlo kay Degala kon paanu mag-online transaction para sa ila operation.
Magluwas sa IPPO, kaupod man sa operation ang Pavia police, Interagency Council Against Trafficking, International Justice Mission, DSWD, Women Children Protection Center (WCPC-Visayas) kag Regional Anti-Cybercrime Unit.
Wala sang may naabtan nga menor de edad ang mga otoridad sang ginsulod ang ginatineran nga balay ni Laffler. (JoMaque)