Pulis nga naaksidente sa San Miguel, under observation sa ospital; hepe sang San Miguel Police Station, nagpahayag nga wala sang early warning device sa ginakay-o nga karsada nga ginluntaran sang aksidente

San Miguel, Iloilo–Nagapabilin sa ospital si PO3 Efren Buscar nga assign sa San Miguel Police Station sang nadisgrasya ang gina-maneho nga motorsiklo sa Brgy 1, Roxas Street kagab-i, Setyembre 20.

May pilas sa ulo si Buscar nga wala naka-helmet sang na-aksidente.

Suno kay PCI Jojo Tabaloc, hepe sang San Miguel Police Station, on-duty si PO3 Buscar kag nag-lisensiya lang sa iya nga may idul-ong sa ila sa Barangay San Jose.

Nadisgrasya ang pulis sa ginapalapad nga dalan sa Brgy 1. Madulom kag wala sang early warning device suno kay Tabaloc ang area sang natabu ang aksidente. Posible suno sa hepe nga wala natalupangdan ni PO3 Buscar ang portion nga bag-o lang ginkutkot.

Ginpanginwala naman ni Tabaloc nga naka-inom ang pulis ukon madasig ang pagpadalagan sini sang motorsiklo.

Ginpanugyanan sang hepe ang contractor sang proyekto nga Woodland Construction nga butangan sang warning device ang lugar agud indi na masundan pa ang aksidente. (AGB)