Barangay tanod, arestado matapos ginpahayag nagpinalupok sang pusil sang nagresponder sa komosyon
Arevalo-, Iloilo City — Arestado ang barangay tanod nga ginpahayag nagpinalupok sang pusil sa Sooc kagab-i (Setyembre 23).
Ginpadakop sa pulis ni Jelly Villasis sang amo man nga lugar si barangay tanod Marlon Arzaga matapos nagpinalupok ini sang nagresponder sa rambol malapit sa balay sang pamilya Villasis.
Sa alegasyon ni Villasis, tatlo ka beses nga nagpalupok si Arzaga nga ginapatihan sang tagreklamo nga .22 caliber revolver.
Suno kay Villasis, una nag-warning shot ang brgy. tanod pero sang ulihi ginpahayag may ginatiro na ini. Wala sang may napilasan sa insidente.
Pursigido si Villasis nga magpasaka sang kaso batuk sa brgy.tanod nga presu sa karsel sang Arevalo Police Station sa kaso nga Alarm and Scandal.
Ginpanginwala naman si Arzaga nga nagpalupok siya sang pusil kag nagpamalibad man ini nga magapa-paraffin test.
Suno kay Arzaga, nagresponder sila kaupod sang duha pa ka brgy tanod sa komosyon bangud may nagtawag sa ila nga may pilason. (JoMaque)