Makati RTC, nagpaguwa sang arrest warrant kag hold departure order batuk kay Senador Antonio Trillanes sa kaso nga rebelyon

Ginmandu sang Makati RTC Branch 150 ang pag-aresto kay Senador Antonio Trillanes 21 ka adlaw matapos ginvoid ni Presidente Rodrigo Duterte ang iya amnesty gani ginbuhi ang mga kaso sa napaslaw nga uprisings sang 2003 kag 2007.

Pirmado ni Judge Elmo Alameda ang duha ka pahina nga arrest warrant batuk kay Trillanes. Ang Branch 150 amo ang naga-uyat sang kaso nga rebelyon batuk kay Trillanes angut sa 2007 Manila Peninsula siege.

Gintalana ni Alameda ang Php200,000 nga piyansa para sa temporaryo nga kahilwayan ni Trillanes.

Nagpadulong naman sa senado ang mga pulis halin sa National Capital Region Police Office kag si court sheriff Bong Carreon agud i-serbe ang warrant kag nag-upod man si Trillanes agud magpa-idalum sa booking process kag magpiyansa.

Pagkatapos nga nakapiyansa, nagbalik sa senado si Trillanes. Nagatenir sa senado si Trillanes halin sang nabuyagyag sang Setyembre 4 nga ginvoid ni Duterte  ang iya amnesty.

Ginpanindugan ni Trillanes nga wala siya sang krimen nga nahimo kag gin-akusaran si Presidente Rodrigo Duterte nga nagapamigos sa iya mga kritiko. (AGB)