(UPDATE) Roxas City police, nagtukod sang tatlo ka teams agud mag-imbestigar sa pagtiro-patay kay Atty. Edeljulio Romero sa guwa sang Culasi Port

Roxas City, Capiz–Nagtukod sang tatlo ka teams ang police agud mag-imbestigar sa kaso nga pagpatay kay Atty. Edeljulio Romero, ang abogado ni the late PDEA identified drug group leader Melvin Odicta.

Suno kay PSUPT Dante Sayco, hepe sang Roxas City Police Office, may grupo nga magapangita sang iban nga testigo sa insidente kag may grupo man nga maga-usisa sa CCTV footage. Samtang ang isa ka grupo ang maga-conduct sang checkpoint sa mga lugar nga posible lutsan sang mga suspetsado. Kasunod ini sang impormasyon nga wala pa nakaguwa sa syudad sang Roxas ang tatlo ka suspek nga sakay sang SUV.

Wala pa gihapon sang identity sa mga suspek ang kapulisan gani nagrequest na sila nga ma-enhance ang kuha sang CCTV camera.

Narecover sa lugar ang duha ka empty shells kag duha ka deformed slugs sang ginapatihan 9mm caliber pistol. Dead-on-arrival sa ospital si Romero bangud sang pilas sini sa likod sang ulo nga naglapos sa tunga-tunga sang duha ka kilay. (AGB)