Porsyon sang drainage canal sa Brgy. Veterans village, City Proper, naguba bangud sang pag-obra sang dalan
Iloilo City – Naguba ang porsyon sang drainage canal sa Brgy. Veterans Village, City Proper bangud sang pag-obra sang delayed road project sa lugar.
Suno kay Engr. Christopher Reyes, site engineer sang Iloilo City District Engineering Office, indi hungod sang ila opisina kag sang contractor nga HF Enterprises nga maguba ang top slab sang drainage canal.
Mabudlay maghulag ang mga equipment kasubong sang backhoe sa lugar suno kay Engr. Reyes.
Ginabanta 18 tubtob 20 metros sang drainage canal ang apektado.
Gin-athag naman ni Engr. Reyes nga indi kabahin sang halos P4-Million contract sang proyekto ang drainage canal.
‘PERWISYO KAG RISGO’
Nagawangal ang mga pumuluyo sa Brgy. Veterans Village kag Brgy. Concepcion, City Proper bangud sang perwisyo nga resulta sang pagkaguba sang mga drainage canal.
Suno kay alyas Len, wala na sang lutsan ang tubig halin sa mga pamalay bangud guba na ang drainage.
Angut sini, nagbaho man ang tubig sa mga bubon malapit sa ginakay-o nga karsada.
Dugang niya, masami na nga nagabaha sa ila lugar bisan mahina lang ang pag-ulan.
‘KAY-UHON’
Nagpasalig si Engr. Reyes nga kayuhon sang contractor ang naguba nila nga drainage canal.
Ginabanta duha ka semana ang pagkay-o sang contractor sa mga naguba nga drainage canal suno sa ICDEO.
Ini ang luwas pa sa pagkay-o sang contractor sa nabilin nga ulubrahon sa road project.
EXPIRED NA PERO WALA GIHAPON NATERMINATE
82 diyas subong nga adlaw pagkatapos nag-expire ang contract sang HF Enterprises sang Hulyo 12, wala sa gihapon ini na terminate bisan sala sang contractor ang rason sang pagkadelay suno sa ICDEO.
Sang Agosto 6 pa ginrekomendar ni City District Engr. Rodney Gustilo sa DPWH 6 ang pagterminate sa contract sang HF Enterprises lakip sa mga contract sang ALJ Construction and Supply sa Brgy. Balantang, Jaro kag Audric Construction and Supply sa Brgy. Zamora, City Proper.
Base sa Department Order 54 series of 2011 sang DPWH, ang regional director ang maga-apruba sa pagterminate sa kontrata sang proyekto nga tubtob Php 50- Million. (JoMaque)