Back rider sang motorsiklo patay, driver pilason sang naaksidente sa Balasan

Balasan, Iloilo — Patay ang back rider sang motorsiklo samtang pilason ang driver sini matapos naaksidente sa Barangay Maya mga las 2:15 kaina sang kaagahon (Oktubre 8).

Ginhingagaw pa nga salbaron sang medical team sang Balasan si Julie Ann Posadas, 23 anyos sang Talotu-an, Concepcion, apang gindeklarar nga napatay ni Dr. Bradly Galo mga las 3:50 sang kaagahon bangod sang patal nga pilas sa ulo.

May pilas man sa ulo kag lawas ang driver sang motorsiklo nga ginkilala kay Carlo Lausin, 29 anyos sang Sitio Cauayan, Brgy. Bulaqueña, Estancia.

Suno kay Police Inspector Alexander Lauron, Officer-in-Charge sang Balasan Police Station, halin sa Poblacion, Balasan ang duha ka biktima kag pabalik na kontani sa Estancia apang pag-abot sa kurbada nga parte sang dalan sa Barangay Maya, nadulaan sang kontrol sa manibela ang driver rason nga nag isi-isi ang motorsiklo tubtub nga nagbunggo sa pader sang gasoline station nga malapit sa lugar.

Padayon nga ginabulong ang driver sang motorsiklo sa ospital. (JoMaque)