Councilors Ed Peñaredondo kag R Leone Gerochi, nagamit sang ila committee chairmanship sa personal interest gani ginkakasan sang komitiba – Councilor Plaridel Nava

 

Iloilo City — Gina-gamit nanday Councilors Ed Peñaredondo kag R. Leone Gerochi ang ila pagka-committee chairman para sa personal nga interest.

Ini ang pahayag ni Councilor Plaridel Nava gani iya ginduso ang resolution nga naga-deklarar nga i-bakante ang pila ka komitiba nga ginapamunuan sang duha ka konsehal. Suno kay Nava, nadulaan na sang pagsalig ang iya mga kaupdanan kanday Peñaredondo kag Gerochi.

Nagpahayag si Nava nga madamo sang meetings ang komitiba nanday Peñaredondo kag Gerochi nga wala gina-upod ang iban nga konsehal ilabe na ang opposition. Nakibot lang sila sa opposition nga may nadihon na nga mga desisyon kag isa sa gintumod ni Nava ang plano nga pagloan sang siyudad sa bangko agud ipatindog sang Iloilo Sports Arena.

Magluwas diri, gin-akusaran man ni Nava ang duha ka konsehal nga gina-gamit sa pumilitika ang ila mga komitiba.

Antes ang pagpasar sang resolution, nagsugilanon si Nava kay Vice Mayor Jeffrey Ganzon angut sa ginpahayag sini pag-abusar nanday Peñaredondo kag Gerochi sang committee chairmanship. Nagpahayag man suno sa konsehal ang bise alkalde nga pareho lang sila sang sintemento.

Ginklaro ni Nava nga tinutuyo nila sa balasahay nga maproteheran ang konseho batuk sa impluwensiya sang pila ka political leaders partikular ang Mayor kag Congressman.

Gindeklarar nga bakante ang posisyon kag chairmanships sang:
*Floor leader
*Assistant Floor Leader
*Committee on Appropriations
*Committee on Rules, Ordinances, Resolutions, Style, Justice and Legal Affairs
*Committee on Transportation, Energy and Public Utilities
*Committee on Urban Planning, Housing and Land Development, Zoning, Expropriation, Assessment and Land Acquisition

Gin-islan ni Nava si Councilor Ed Peñaredondo bilang Floor Leader samtang si Councilor Love love Baronda ang nagpungko bilang Assistant Floor Leader tal-us kay Councilor Gerochi.

Ginhatag man kay Nava ang chairmanships sa nahinambit nga mga komitiba magluwas lang sa Zoning nga ginhatag kay Councilor Jay Treñas.

Ginkuha kay Peñaredondo ang Committee on Appropriations; Urban Planning Housing and Land Development, Zoning, Expropriation, Assessment and Land Acquisition kag Rules, Ordinances, Resolutions, Style, Justice and Legal Affairs.

Ginkuha naman kay Gerochi ang Transportation, Energy and Public Utilities. (JoMaque)