Pila ka mga pumuluyo sang San Pedro, Molo, nagawangal bangud ginasulod sang tubig ang ila balay kon magsaka ang level sang tubig sa Iloilo river; Palpak nga drainage ginatudlo rason sang mga pumuluyo

Iloilo City–Duha ka tuig na ang pag-antus sang mga residente sa San Pedro, Molo, bangud ginasulod sang tubig ang ila mga panimalay sa tion nga magtaas ang level sang tubig sa Iloilo River.

Suno kay Julie, humalin sang gintukod ang Esplanade 2 kag ginbutangan sang drainage nga naga-angut sa ila lugar pakadto sa Iloilo River, nangin problema na nila ang naga-backflow nga tubig halin sa Iloilo River nga naga-agi sa drainage kag nagakadto sa ila pamalay.

Dako nga huol para sa ila pagsinalayo ang tubig nga nagahalit sa ila sa tiun sang high tide bangud indi sila makahimo sang ila mga olobrahon kon magsaka ang level sang tubig.

May tiun suno sa iya nga nagalapaw sa tuhod ang kadalumon sang tubig rason indi sila maka gwa sa ila balay.

Dugang pa sini nagakakibot na lang ang iban sa ila nga basa na ang ila likod kon kagab-ihon bangud nalab-ot na sang tubig ang salog sang ila balay.

Natinguhaan naman ni Julie nga idangop sa barangay ang ila problema apang sabat sang kapitan, “Wala kami da labot kay iya na sang siyudad.”

Ginabanta mga 20 tanan ka balay ang apektado sa lugar.
Panawagan ni Julie nga kuntani gilayon nga masolusyunan ang ila problema, bangud nabudlayan na gid sila sa ila pagginawi. (JoMaque)