Tanod, nasapwan nga patay sa talamnan sa Barotac Viejo
Barotac Viejo, Iloilo–Patay na kag madamo sang dugo sang nakita ang bangkay sang barangay tanod sa talamnan sa Barangay La Fortuna subong nga aga, Oktubre 10.
Makita sa kilid sang bangkay ang balisong pero indi pa-maestablisar kun diin ang pilas sini.
Ginkilala ang napatay kay Ronel Canadilla alyas “Patu” nga ginabanta naga-edad 40-anyos kag residente man sang amo nga lugar.
Makita man ang tinulo sang dugo halin sa kilid sang karsada pakadto sa talamnan sa diin nakita ang bangkay.
Suno kay La Fortuna anay Punong Barangay Levi Alasian, wala sila sang nahibaluan nga kontra ang napatay.
Ginpahayag nga nag-inum-inom ang biktima kagab-i upod sa iban pa antes ini nasapwan subong nga aga. (AGB)