Ginkabkab nga karsada sa Tigbauan, liwat nga gintanuman sang puno sang saging

Tigbauan, Iloilo — Gintanuman liwat sang puno sang saging ang ginkabkab nga karsada sa Allera Street sa Brgy. 8.

Suno kay Punong Barangay Elena Titular, gintanum sang mga pumuluyo sa barangay ang saging kaina sang aga, Oktubre 10, matapos ginbayaan liwat sang contractor ang ginkabkab nga karsada sang Domingo, Oktubre 7.

Ginkuha naman sang mga pumuluyo ang gintanum nga saging bangud ginbalikan sang contractor nga Edison Development and Construction ang proyekto subong nga hapon.

Una na ginpahayag sang representante sang contractor nga mangita na lang si Titular sang contractor nga mabulos sa ila matapos nagtrending sa Facebook ang post sang pumuluyo natuhoy sa gintanum nga puno sang saging, balunggay, kapayas kag palma sa ginkabkab nga karsada.

Ginakuhaan sang Aksyon Radyo Iloilo sang pahayag ang DPWH- 1st District Engineering Office apang wala gihapon sila nakahatag sang official statement.

Nagabalor sang P 24-Million ang proyekto nga ginapa-abot makumpleto sa Oktubre 28, 2018 kun basehan ang kontrata. (JoMaque)