UNA NGA ADLAW SANG FILING SANG CERTIFICATE OF CANDIDACY SA SYUDAD KAG PROBINSYA, NANGIN MATAWHAY SUNO SA CITY KAG PROVINCE COMELEC OFFICES

Matawhay ang una nga adlaw sang filing sang certificate of candidacy sa provincial Comelec office sa Lapaz.

Suno kay Provincial Comelec Officer Atty. Elizabeth Doronila, wala sila sang nasugata nga mga problema bangud napreparahan sang maayo ang nasambit nga aktibidad.

Ginpanugyananan ni Doronila ang may mga kandidato nga magfile sang temprano bangud lima ka adlaw lang ang COC filing nga nagsugod kahapon kag magapadayon subong, Oktubre 15, 16 kag 17 kag wala sang extension.

Wala man nadala sa filing ang Oktubre 13, Sabado, kag Domingo, Oktubre 14.

Sa record sang provincial Comelec, 14 ang nagfile kahapon-duha sa pagka-gobernador, isa sa pagka-bise gobernador, apat sa pagka-congressman kag pito sa pagka0-board member.

Halin lang alas-8 sa aga tubtob alas-5 sa hapon ang pagfile sang COC.

Ginabaton sa provincial Comelec office ang COC sang mapadalagan gobernador, vice governor, congressman kag board members.

Samtang sa syudad naman, siyam ang nagfile sang certificate of candidacy sa city Comelec sa pagsugod sang COC filing kahapon.

Suno kay Jonathan Sayno, election assistant 2 sang city Comelec, una gid nag nagfile ang grupo ni Mayor Joe Espinosa sa pagbukas sang ila opisina kahapon sang aga.

Kaupod ni Espinosa ang iya kandidato sa pagka-vice mayor nga si Councilor R Leone Gerochi kag kandidato sa pagka-kongresista nga si former Councilor Perla Zulueta kag mga kandidato sa pagka-konsehal nga sanday Councilors Ed Peñaredondo, Candice Tupas, Liezl Salazar, Mandrie Malabor Lyndon Acap kag anay Councilor Rodel Agado.

Nangin magahud ang pagfile sang grupo sang COC bangud gin-updan sila sang ila mga supporters nga nakasuksok sang blue t-shirts.

Nakasuksok naman sang orange t-shirts ang alkalde kag iya mga kaupod sa linyada.

Nanindugan naman si Espinosa nga wala siya sang ginpanghatag nga kuwarta sa nag-upod niya nga mga supporters.