Mag-asawa nga senior citizens sa Alimodian, patay sa pagpanglabu

Alimodian, Iloilo–Patay ang mag-asawa nga senior citizens nga ginpanglabu sa sulod sang ila balay sa Barangay Umingan, Alimodian sang Oktubre 10 sang gab-i.

Ginkilala ang napatay kanday Mamerto, 62, kag Emma Camral, 63, nga lunsay mga residente man sang amo nga lugar.

Suno kay Inspector Danilo Noca, hepe sang Alimodian Police Station, may pilas si Mamerto sa ulo, agtang, baba, abaga kag likod samtang si Emma ang may pilas liog, baba kag tiyan. Pareho nga may defense wounds sa kamot ang mag-asawa.

Kaupod sang mag-asawa sa balay ang ila solterito nga apo nga si Rainier apang natabuan nga may ginkadtuan ini kag naabtan na lang nga duguon ang duha.

Gin-ako ni Noca nga wala pa sila sang identity sang mga suspek kag motibo sa krimen apang nagpasalig nga padalman ang imbestigasyon. (AGB)