5th District BM Neilo Tupas, ginarespeto ang tikang sang iya magulang nga si anay Cong. Junjun Tupas nga pakontrahan siya sa pagka-mayor sa Btac. Viejo

Iloilo — Ginarespeto ni Iloilo 5th District Board Member Neilo “Bongbong” Tupas ang tikang sang iya magulang nga si anay Congressman Niel “Junjun” Tupas, Jr nga pakontrahan siya sa pagka-mayor sa Barotac Viejo.

Suno kay BM Tupas, ginapaabot na niya nga may mabunggo sa iya kag normal lang ini sa politika. Posible man suno sa iya nga nagapangita sang kandidato ang iya magulang nga maupod sa kawsa sini.

Paagi sini, mahatagan sang kahigayunan ang mga pumuluyo nga makapili sang lider nga magpamuno sa ila.

Ginatugyan ni BM Tupas sa mga pumuluyo ang pagpili kon sin-o nga kandidato ang ila suportahan. Naka-file na sang certificate of candidacy si BM Tupas sang Oktubre 11.

Sa pagkamatuod suno sa iya, anum ka mga incumbent Sangguniang Bayan members ang nag-upod sa iya grupo.

Wala pa naka-file sang COC si Dr. Ulysses Valdez nga ginpahayag kandidato ni anay Cong. Tupas nga mabunggo sa iya sa pagka-alkalde. (JoMaque)