Lalaki, gintiro patay sang iya bayaw sa Alimodian
Alimodian, Iloilo — Patay ang lalaki nga gintiro sang iya bayaw sa Barangay Balabago kagab-i, Oktubre 13.
Ginkilala ang biktima kay Edgar Francisco, 42 sang amo man nga lugar.
Suno kay Inspector Danilo Noca, hepe sang Alimodian Police Station, nadakpan sa follow-up operation ang suspek nga si Nilo Amora, 62 anyos.
Base sa imbestigasyon sang police, papuli na si Francisco sang ginlambatan kag gintiro gamit ang ginapatihan shotgun.
May duha ka igo ang biktima sa tuo nga ilok kag duha sa likod kag gindala pa sa Aleosan Hospital apang gindeklarar nga dead-on-arrival.
Away sa pamilya ang ginasunod nga motibo sa krimen.
Nanginwala naman si Amora nga siya ang nagtiro sa iya bayaw apang may testigo suno kay Inspector Noca nga positibo nga nagtudlo sa suspek. (JoMaque)