1 patay, 2 pilason sa bunggu-anay sang 2 ka motorsiklo sa Passi City

Passi City, Iloilo – Isa patay kag duha pilason sa bunggu-anay sang duha ka motorsiklo sa Sablogon, Passi City kahapon sang hapon (Oktubre 14).

Suno kay Supt. Arturo Fullero, hepe sang Passi City Police Station, dead on arrival sa ospital si Ramel Pelaez, 28-anyos sang Barangay Pangi, Passi City bangud sang patal nga pilas sa ulo.

Pilason naman sanday Gregorio Pedregoza, 47-anyos sang Barangay Pangi nga naka-angkas kay Pelaez kag Christian Jade Cezar, 20-anyos sang Pigcawayan, North Cotabato nga isa ka soldado kag assigned sa 61st Infantry Battalion sang Philippine Army.

Sa initial nga imbestigasyon, posible nga nag-overtake ang ginamaneho nga motorsiklo ni Pelaez sa ginasundan nila nga salakyan kag naglapaw sa pihak nga lane rason nga nabungguan ang motorsiklo ni Cezar.

Under observation naman sa ospital sanday Pedregoza kag Cezar nga lunsay nagpalanakit ang lawas kag napilasan sa ulo. (JoMaque)