Numero sang mga turista nga pasudlon sa Boracay, limitahan

Malay, Aklan–Limitahan ang magasulod nga mga turista sa isla sang Boracay kada adlaw.

Ini ang ginconfirmar ni Mr. Rowen Aguirre, Executive Assistant to the Mayor sang Malay, Aklan, kadungan sang pagsugod sang 10-day dry run sang isla subong nga adlaw, Oktubre 15.

Suno kay Aguirre, 6,405 lang ka turista ang pasugtan nga makasulod sa isla. Wala nalakip sa numero ang mga trabahador sa isla kag ginaplano man nga patineron sa mainland ang mga workers agud mabuhinan ang carrying capacity sang Boracay.

Bisita sa una nga adlaw sang dry run sanday Department of Environment and Natural Resources Secretary Roy Cimatu, Department of Interior and Local Government OIC Eduardo Año kag Department of Tourism Secretary Bernadette Romulo-Puyat.

Magalawig tubtub sa Oktubre 25 ang dry run. Sa Oktubre 26 naman ang reopening sang Boracay matapos ginsiraduhan sang Abril 26 para sa rehabilitasyon. (AGB)