4 pilason sa bunggu-anay sang tricycle kag 6-wheeler truck

Jaro, Iloilo City – Apat pilason sa bunggu-anay sang tricycle kag 6-wheeler truck sa Barangay Buntatala, Jaro subong nga gab-i (Oktubre 14).

Gina-maneho ang tricycle ni Dioqueno Seloberes, 56-anyos kag sakay ang asawa nga si Veronica, 55 kag pakaisa nga si Lea Rose Miranda, 38-anyos sang La Granja, Lapaz sang naaksidente. Nagbanog ang tiil ni Dioqueno; may gisi sa guya kag pilas sa baba si Veronica; samtang may pilas naman sa magtimbang nga tuhod kag nagpalanakit ang lawas ni Miranda.

Suno kay Alyas Tupi, nakakita sa aksidente, halin sa Jaro kag padulong sa Leganes ang direksiyon sang 6-wheeler truck nga ginamaneho ni Rey Mallorca, 31 sang Calaboa, Leganes samtang halin naman sa Leganes kag padulong sa Jaro ang direksiyon sang tricycle.

Madasig suno sa iya ang dalagan sang truck kag gin-likawan sini ang nagtabok nga babaye sa dalan kag iya nawakli pa-wala ang manibela gani nabungguan sang truck ang tricycle sa pihak nga lane. Nagtabog pa suno diri ang pasahero sang tricycle.

Liwat nga ginwakli pa-tuo ni Mallorca ang manibela kag nakabunggo naman ang truck sa poste. Madugay pa nga napaguwa si Mallorca sa truck bangud naipit ini kag napilasan sa tiil.

Suno naman sa Jaro police, napanimahuan nila sang makahulubog nga ilimnon si Mallorca nga preso na subong sa Jaro Police Station.

Napatay naman ang hinuptanan nga ido sang mag-asawa matapos ang aksidente.

Samtang, padayon nga ginabulong sa ospital ang tatlo ka sakay sa tricycle. (JoMaque)