Maestra sa Passi City, nasapwan patay; may pilas sang pagkabuno kag may lampos sa ulo

Passi City, Iloilo–Ginkumpirmar ni PSupt Arturo Fullero, hepe sang Passi City Police Station, nga nasapwan nga patay na ang maestra sang Gemumua-Agahon Elementary School.

Ginpahayag sini nga pasado las dyes kaina sang aga, Oktubre 15, sang nakabaton sila sang report sa kamatayon sang maestra.

Ginkilala ang napatay kay Ma. Corazon Tionson y Doblado, 55, single kag Grade 3 teacher.

Nasapwan ang biktima sang iya labandera nga si alyas Lena.

Suno kay Fullero, nasapwan ang manunudlo nga may duha ka pilas sang pagkabuno sa likod kag may igo sang ginapatihan martilyo sa ulo base sa na-recover nga martilyo sa crime scene nga ginpahayag may buhok pa nga nagatapik.

Hublas ini nga nagakulob sa iya hiligdaan, nabaklid kag may busal sa baba sang nasapwan.

Nagalinapta naman ang kagamitan sa sulod sang balay sang maestra.

Gilayon nagpalagyo ang suspetsado nga gin-identify ni Fullero nga si June Aguilar, 34 kag residente man sang amo nga barangay. Gintumod ini nga suspek matapos nakita sa iya balay ang kulintas sang biktima.

Mahina ang network signal sa Gemumua-Agahon, pinakamalayo nga barangay sang Passi City. (AGB/KJT/NG)