(UPDATE) Suspek sa pagpangbuno sa pamilya sa Molo sa diin 2 ang napatay, nanindugan nga wala siya sang kahilabtanan sa krimen

Iloilo City–Ginpanindugan sang suspek sa pagpangbuno sa pamilya sa Barangay San Antonio, Molo kahapon, Oktubre 15, sa diin duha ang patay kag isa ang pilason nga wala siya sang kahilabtanan sa krimen.

Suno kay Rene Diocos Kr, tumandok sang Alimodian apang temporaryo nga naga-istar sa Compania Central, Molo, nagabakal lang siya sang habon panglaba, gel kag fabric conditioner sang nakita nga may gina-istorya nga lalaki ang tag-iya sang tyangge nga si Teresita Tagriza, 74.

Gulpi lang nakabati siya sang lagapok kag nakita niya nga ginabuno sang suspek si Teresita gani iya ginsalo apang naigo siya sang kutsilyo sa kamot tubtub nga nagbalik suno sa iya sa sulod sang compound ang suspek. Ginhawiran man siya sang isa pa ka biktima nga may pilas nga luyag nga maguwa sa puwertahan kabangdanan natumba siya.

Nakita man ni Diocos ang duha ka tuig nga bata nga nagadalagan apang ginhakwat sang iya iloy nga si Julie Ann Peñafiel.

Nagdalagan paguwa sa compound si Diocos apang nadasma siya kag nagtabog ang iya liyabe kag bracelet tubtub nga nasal-an siya sang mga tawo nga siya ang suspek.

Magluwas kay Teresita, napatay man ang timbang nga si Remedios Malaga sang Sambaludan, Oton samtang confined sa ospital si Peñafiel. (AGB)