Balay sang mga Salcedo kag iban pa nga personalidad, gin-subject sa search warrant; dismissed SPO4 Ricky Salcedo kag hinablos sini, patay matapos nga ginpahayag nagbato

Ginkumpirmar ni Iloilo Police Provincial Police Office (IPPO) Director Marlon Tayaba nga 14 ka search warrants para sa indi magnubo sa 10 ka personalidad sa 14 ka mga locations may kaangtanan sa illegal possession of firearms, ammunitions and explosives ang ginserbi sa mga Salcedo kag iban pa nga konektado sa ila.

Subject sa mga search warrants sa Sara sanday:

1. Sara Ex-Mayor Neptali “Tali” Salcedo (balay sa Poblacion Ilawod kag Antonio Yusay)

2. Noel Salcedo (balay sa Barangay Salcedo kag Lanciola), utod ni Tali

3. Nerio ‘Ricky’ Salcedo (balay sa Poblacion Ilawod), bata ni Tali, dismissed PNP member

4. Atty. James Balsomo II (balay sa Antonio Yusay), municipal administrator sang Sara

5. James Balsomo I alias Jaguar (balay sa Antonio Yusay), SB Secretary

6. Barangay Captain Richie Paciente (balay sa Barangay Apelo)

7. Barangay Kagawad Juanny Demo (Anay kapitan man sang Brgy. Muyco), ang bata ni Demo asawa ni Tali

8. Brgy. Captain Henry Balume (Barangay Del Castillo)

9. Brgy. Captain Jully Balume alias Tartar (Barangay Dominggo)

10. Nixon Salcedo Sr (balay sa Nagsulang, Lemery), bata ni Tali

11. Frank George Sanson (balay sa Cano-an, Estancia), port manager sa Estancia

12. Nestor Arante y Beboso (balay sa Sitio Cambang Bato, Bariga, Banate)

13. Nixon Salcedo Jr (Poblacion Ilawod)

Ginpahayag nga ginpaidalum sa Oplan Katok ang mga subjects pero wala nag-surrender kabangdanan ginkasa sang police ang operation.

Wala si Nixon Sr natabuan sa iya balay.

Nakuha naman sa balay ni Sanson ang lima ka sachets sang suspected shabu kag digital weighing scale. Wala man sa iya balay si Sanson. Si Sanson ang ginpahayag konektado man sa mga Salcedo.

Suno kay Tayaba, natiruhan si Ricky Salcedo matapos nga ginpahayag nga nagbato samtang nagapasulod ang raiding team sa iya balay. Separado ang balay sini sa balay sang iya amay. May impormasyon man nga mas nauna nga ginsulod ang balay sang anay pulis.

Gindala pa sa ospital ang anay pulis pero gindeklarar nga dead-on-arrival las 5:10 sang kaagahon.

Ginpahayag ni Tayaba nga duha ka semana na ang nakaligad, may ginbutang nga placard sa atubang sang iya balay si Ricky Salcedo nga nagapanghangkat sa mga pulis.

Magluwas sa anay pulis, patay man ang hinablos sini nga si Nixon “TJ” Salcedo Jr.

Ang operation ginhimo sang composite team nga nga ginabug-usan sang 300 ka personnel halin sa IPPO, Special Action Force (SAF), Regional Special Operations Group (RSOG), Regional Drug Enforcement Unit (RDEU), Criminal Investigation and Detection Group (CIDG) kag Philippine Drug Enforcement Agency (PDEA). (AGB/MO)