Sara Mayor Ermelita Salcedo kag 16 anyos nga live-in partner ni dismissed SPO4 Ricky Salcedo nga napatay sa police operation, gin-custody sang PRO 6

Camp Delgado, Iloilo City–Gin-custody Police Regional Office (PRO) 6 sanday Mayor Ermelita Salcedo sang Sara kag alyas Ja, 16-anyos nga live-in partner ni dismissed SPO4 Nerio “Ricky” Salcedo nga napatay police operation kahapon, Oktubre 17.

Suno kay PRO 6 Director PCSUPT John Bulalacao, ginatun-an pa sang mga imbestigador ang posible kaangtanan sang alkalde kag sang live-in partner sa kaso bisan pa nga indi sila subjects sang search warrant. Hatagan sang kahigayunan sanday Salcedo kag Ja nga magpa-athag agud mahibaluan kon may partisipasyon sila.

Base sa paathag sang abogado sa press briefing sang PRO 6 kahapon, posible nga may kahilabtanan si Mayor Salcedo sa constructive possession of firearms apang ginapaminsar pa nila kun ano ang dapat mangin involvement sini sa kaso.

Iga-release man sang PRO 6 ang duha kon mapamatud-an nga wala sila sang kahilabtanan.

Ginpahayag ni bulalacao nga maga-file sila sang kaso nga illegal possession of firearms batuk kay former Mayor Neptali Salcedo matapos na-recover ang pila ka high-powered firearms sa iya balay.

Padayon man nga i-monitor sang kapulisan ang aktibidad sang mga Salcedo kon mapasakaan sang kaso kag mahimo sang aksyon kon may makuha nga ebidensya. (AGB)