Magbilas nga Mayor Joe Espinosa kag Cong. Jerry Treñas, padayon nga nagawaswasanay samtang nagahilapit ang 2019 elections

Iloilo City — Gintawag ni City Lone District Congressman Jerry Treñas nga eskandaloso ang isyu nga nagalab-ut sa milyon ang gasto sang iya bayaw, Mayor Joe Espinosa, sa ginapanghatag nga lechon kag ginakuha ang budget sa kaban sang gobyerno.

Suno sa kongresista, wala sang parametro ang paghatag sang lechon gani wala nahibaluan kon sin-o ang ginahatagan kag kon ano ang basehan. Ginpahayag ni Treñas nga indi lang mga punong barangay ang ginahatagan ni Espinosa sang lechon.

Una nga ginpaguwa ni Treñas ang statement angut sa gasto sang alkalde sa lechon sang nag-file ang kongresista sang iya COC sa pagka-mayor sang Oktubre 17.

Nagsabat naman si Mayor Espinosa nga madamo nga barangay kapitan ang nagapangayo sa iya sang lechon ilabe na kon fiesta kag nagakaun man ang kongresista sang lechon halin sa City Government.

Gintindugan naman ni Treñas ang una nga pahayag nga hubog kada gab-i si Espinosa.  Suno sa alkalde, na-react lang siya sa ginapaguwa nga balita nga nagabalatian siya kag na-ospital. (JoMaque)