9 miembro sang NFSW, patay sang ginpangtiro sang mga armado nga lalaki sa Hacienda sa Sagay City, Negros Occidental
Sagay City, Negros Occidental — Patay ang siyam ka miembro sang National Federation of Sugar Workers sang ginpangtiro sang mga armado nga lalaki sa Hacienda Nene Purok Firetree sa Brgy. Bulanon las 9:45 Sabado sang gab-i, Oktubre 20.
Suno kay Police Chief Inspector Robert Mansueto, hepe sang Sagay City Police Station, naglab-ot sa 40 ka armado nga lalaki ang ginpahayag nag-atake sa mga biktima.
Sa initial nga imbestigasyon sang Sagay City police, nagapahuway ang mga biktima sa ginhimo nga tolda-tolda sa sulod sang Hacidenda sang ginpangtiro.
Nagresulta ini sa kamatayon sang siyam ka mga biktima nga ginkilala kanday;
1) Eglicerio Villegas Y Cambunga alyas Poloy, 36 yo, Brgy Bulanon, Sagay City
2) Angelipe Arsenal Y Dumaguit, 47, Brgy Bulanon, Sagay City
3) Paterno Baron, 48, Brgy Plaridel, Sagay City
4) Rene Laurencio alyas Dodong, 52, Brgy Plaridel, Sagay City
5) Morena Mendoza, 49, Brgy Bulanon, Sagay City
6) Marcelina Dumaguit, 66, Brgy. Plaridel
7) Ranel Bantigue, 41, Brgy Plaridel, Sagay City
8.) Jomarie Ogahayon Jr y Biatengo alyas Toto, 16 anyos, Purok Cesco, Brgy. Rafaela Barrera, Sagay City
9) Marchtel Sumicad y Alovera alyas Mike, 17 yrs old, Purok Mahogany, Brgy. Bulanon, Sagay City.
Napilasan naman ang tatlo ka iban pa nga mga mangunguma kasunod sang insidente.
Nagapadayon ang imbestigasyon sang Sagay City Police sa motibo sang insidente kag identity sang mga suspetsado.
“Reward Money”
Nantanyag sang kapin tunga sa milyon nga padya ang Negros Occidental Provincial Government kag Sagay City Government sa makahatag sang impormasyon natuhoy sa mga suspetsado sa pagpangtiro sa Hacienda Nene, Purok Firetree Brgy. Bulanon sa Sagay City nga nagbilin sang 9 ka mga mangunguma nga napatay kag 3 ka iban pa nga pilason.
P250,000 ang ginpasalig nga padya ni Negros Occidental Governor Alfredo Marañon Jr.
Dugang nga P250,000 naman ang ginpasalig ni Sagay City Mayor Alfredo Marañon III.
Suno kay Police Chief Inspector Robert Mansueto, hepe sang Sagay City Police Station, naglab-ot sa 40 ka armado nga mga lalaki ang nag-atake sa mga biktima nga nagapahunay hunay sa gintukod nila nga hayub hayub sang nagluntad ang insidente.
“Ginakondenar”
Ginkondena sang National Federation of Sugar Workers ang pagpatay sa siyam nila ka miembro lakip ang apat ka mga babaye kag duha ka menor de edad sa Hacienda Nene sa Purok Firetree, Barangay Bulanon, Sagay City.
Base sa FB Page sang amo nga grupo, nagluntad ang brutal nga pagpatay sa una nga gab-i sang ila land cultivation area ukon bungkalan sa amo nga lugar.
Ang bungkalan ukon ang pag-occupy sang mga mangunguma sang porsyon sang duta para tanuman ang sabat sang grupo sa ila kampanya para sa genuine agrarian reform kag free land distribution.
Ginapakita sang bungkalan suno sa grupo ang kapaslawan sang gobyerno sa land reform program kag ang pagpamatok sang mga landlords sa pagdistribute sang duta sa mga mangunguma.
Ginsuportahan man sang Unyon ng mga Manggagawa sa Agrikultura ukon UMA ang pagkondena sa krimen.
‘Mandu ni PRO 6 Director Bulalacao’
Nagmandu si Police Regional Director 6 Director John Bulalacao nga imbestigaran sang maid-id ang pagtiro-patay sa siyam ka miembro sang National Federation of Sugar Workers sa Purok Firetree, Brgy. Bulanon, Sagay City.
Suno kay Bulalacao, nagaconduct na subong sang hot pursuit operation ang Sagay City police kag Special Action Force batuk sa wala pa nakilal-an nga mga suspetsado.
Una na nagpahayag si Police Chief Inspector Robert Mansueto, hepe sang Sagay City Police Station, nga ginabanta 40 ka armado nga mga lalaki ang nagtiro sa mga biktima nga nagapahunay hunay sang nagluntad ang insidente.
Wala pa natul-id kun ano ang motibo sa krimen. (JoMaque)