Asawa kag ginapatihan iya kerido, ginpapreso sang bana matapos nadakpan sa akto nga magkaupod sa isa ka balay

Iloilo — Nadakpan sa akto sang iya bana ang asawa kaupod ang iya ginapatihan kerido sa balay mismo sang lalaki mga las 9 Sabado sang gab-i (Oktubre 20) sa isa ka barangay sa Pototan.

Ang babayi ginkilala kay alias Beauty, 45 sang Passi City kag may 7 ka kabataan samtang ang ginpahayag kerido ginkilala kay alias Boy, 42 anyos sang Pototan kag may 2 ka kabataan.

Sa exclusive interview sang Aksyon Radyo, gin-ako nanday Boy kag Beauty nga duha ka tuig na ang ila relasyon nga nagsugod bilang mag-textmate.

Suno kay Boy, masami nagakadto sa iya balay si Beauty.

Suno naman kay Beauty, nahimo niya nga makipagrelasyon kay Boy bangud masami sila sang iya kabataan nga ginasakit sang iya bana kon mahubog.

Tuyo man sini kuntani nga magbalik sa iya bana rason nga nagkadto siya kagab-i sa balay ni Boy agud mag-istorya nga balikan na niya ang iya bana.

Gin-athag ni Boy nga indi man niya pagpunggan si Beauty kon luyag sini magbalik sa iya bana.

Samtang naga-istoryahanay ang duha kagab-i, nag-abot ang bana ni Beauty kag may upod na nga pulis.

Suno kay PO2 Teffany Altura-Magbanua sang WCPD-Pototan, ginahulat pa nila ang desisyon sang bana kon mapasaka ini sang kaso.

Preso ang duha sa Pototan Police Station kag posible nga magpangatubang sang kaso. (JoMaque)