Bangkay sang lalaki, nasapwan sa creek sa Jaro; suspek sa pagpatay, nadakpan

Iloilo City–Nasapwan ang lalaki nga naga-utaw-utaw sa creek sa River Plains Subdivision Barangay Lanit, Jaro kagab-i, Oktubre 21.

Ginkilala ang lalaki kay Nelson Johann Sotaso, 33 anyos sang amo man nga lugar, nga may pilas sa ulo nga ginapatihan ginlampusan sang matig-a nga bagay.

May bagras man sa likod sang iya lawas si Sotaso nga gindala pa sa ospital apang gindeklarar nga napatay.

Ginatudlo nga suspek si Daniel Oscares, 22-anyos sang nasambit nga lugar.

Base sa panaysayon sang testigo nga si alyas Ronnie, nabatian pa sini sa sulod sang iya balay nga nagabaisay ang biktima kag ang suspek antes niya nakit-an si Oscares nga ginahampak sang bato si Sotaso.

Nadakpan naman ang suspek kag presu na sa karsel sang Jaro Police Station. (AGB)