Franchise application sang More Electric and Power Corporation, gin-grant sang Senate Committee on Public Services sa hearing kaina sang aga; technical working group para sa transition, ginduso sang mga miembro sang komitiba

Senate–Gin-aprubahan sang Senate Committee on Public Services ang motion para sa franchise application sang More Electric and Power Corporation sa hearing nga ginpamunuan ni chairperson Senator Grace Poe kaina sang aga, Oktubre 22.

Gin-athag sang mga miembro sang komitiba nga ginabug-usan nanday Senators Migz Zubiri, Chiz Escudero, Sherwin Gatchalian kag Risa Hontiveros nga ang franchise application sang MORE ang ila gintalakay bangud ini ang gin-endorso sa ila sang Kamara. Pending gihapon sa Kamara ang application sang Panay Electric Company ukon PECO.

Nag-file sang motion si Zubiri nga magtukod sang technical working group para sa transition kag pagsolbar sang mga isyu pareho sang refund sa mga consumers kag iban pa nga safeguards kag devaluation sang PECO agud masiguro nga mabayaran sila kon pinal na nga indi ma-renew ang ila franchise. Nagsuporta sa motion nga nagalakip sa pag-grant sang franchise application sang MORE sanday Escudero kag Poe.

Ginpasiguro naman ni Atty. Gregorio Ofalsa, director sang Legal Service sang Energy Regulatory Commission ukon ERC, nga indi madulaan sang elektrisidad ang Iloilo City.

Maga-expire ang franchise sang PECO sa Enero 18, 2019. (AGB/with additional information from GMA News)