Manugpangasag, gingul-golan patay sa Estancia; suspek nga iya kaupod, nadakpan

Estancia, Iloilo – Patay ang manugpangasag sang gingul-golan sang kaupod sini sa port sa Estancia Sabado sang gab-i (Oktubre 20).

Ginkilala ang napatay kay Arnulfo Asabis, alias “Dong-Dong” legal ang edad kag residente sang Bantayan Island, Cebu nga nautod gid ang puwak.

Nakabaton sang report ang Estancia Police halin sa maritime police nga may stabbing incident nga nagluntad sa port. Sang nagresponder ang mga pulis, ila naabtan ang suspect nga si Prementibo Maro, 50-anyos sang Bantayan Island. Gin-usisa sang mga pulis si Maro apang nagpahayag ini nga iya lang nga gintapungol si Asabis.

Wala nagpati ang mga pulis gani ila nga ginpangita ang biktima kag nasapwan na ini sa dagat.

Suno naman sa nakakita sa krimen, nagainom-inom ang duha antes natabu ang insidente. Ginpahayag sini nga nag-away ang duha kag ginkuga ni Maro ang biktima samtang ginagul-golan gamit ang ginapatihan plamingko.

Depensa naman sang suspect nga una siya gintuyo nga bun-on sang biktima gani nagkuha ini sang plamingko agud depensahan ang kaugalingon.

Yara na sa custody sang Estancia police si Maro samtang yara naman sa isa ka punerarya sa banwa ang bangkay sang biktima.

Ang duha ang kaupod nga nagapangasag kag temporaryo lang nga nagadungka ang ila sakayan sa port sang amu nga banwa. (JoMaque)