Suldado kag sibilyan, patay sa aksidente sa motorsiklo sa Miagao

Miagao, Iloilo — Patay ang miembro sang Philippine Army kag sibilyan sa pagbunggu-anay sang duha ka motorsiklo sa Barangay Bolho, ala 1 kahapon sang kaagahon (Oktubre 21).

Suno kay Chief Inspector Johnny Tumambing sang Miagao Police Station, ginkilala ang mga napatay kanday Corporal Clyde Rilleta, tumandok sang Bohol kag assigned sa 94th Infantry Battalion, Bravo Company sang Philippine Army kag Arvin Flonasca, 28 anyos sang Miagao.

Nagapakadtu sa Camp Monteclaro sa Miagao ang motorsiklo nga ginamaneho ni Corporal Rilleta upod ang duha pa ka suldado nga sanday Corporal Jake Villanueva kag Corporal Ryan Bauzon sang nabungguan ang motorsiklo nga ginamaneho naman ni Flonasca.

Dead-on-arrival sa health center sang Miagao si Flonasca bangud sang pilas sa ulo samtang patay man sang nag-abot sa Guimbal District Hospital si Corporal Rilleta nga napilasan sa ulo kag tuo nga paa.

Padayon nga confined sa Western Visayas Medical Center si Corporal Villanueva samtang out patient si Corporal Bauzon. (JoMaque)