PDuterte, wala nadayon sa pagbisita sa hamyang sang 9 ka gin-masaker nga sakada sa Sagay City
Sagay City, Negros Occidental–Kanselado ang pagbisita ni Presidente Rodrigo Duterte sa Sagay City para bisitahon ang pamilya kag hamyang sang 9 ka miyembro sang National Federation and Sugarcane Workers (NFSW) nga napatay sa masaker sa Hacienda Nene, Barangay Bulanon, Sagay City sang Oktubre 20 sang gab-i.
Gin-anunsyar sang Media Accreditation and Relations Office ukon MARO nga kanselkado ang presidential visit subong nga gab-i, Oktubre 23. Suno sa ila, naka-abot na sa Silay City Airport si Presidente Duterte kag masakay na sa helicopter agud magpadulong sa Sagay City. Apang nagbalik na lang bangud tuman ka baskog sang ulan.
Alas-7 pa lang kaina sang aga naplastar ang lungon sang 9 ka napatay sa session hall sang Sagay City Government Center. Naghulat man ang mga pamilya sang mga biktima.
Nagpasalig ang presidente suno sa MARO nga mabisita gid ini sa hamyang sang mga biktima. (AGB/AS)