(UPDATE) Grade 3 teacher nga ginhimuslan kag ginpatay sa Passi City, ginlubong na kaina sang hapon

Iloilo City–Ginlubong na kaina sang hapon ang Grade 3 teacher nga ginhimuslan kag brutal nga ginpatay sa Gemumua-Agahon, Passi City sang Oktubre 14 sang gab-i.

Halin sa Passi City, gindala sa syudad ang bangkay ni Ma. Corazon Tionson, 55 kag manunudlo sa Gemumua-Agahon Elementary School. Nagkumpanyar ang mga kaupod sa trabaho, mga estudyante, kag iban pa nga naghatag sang suporta sa pamilya sang maestra.

Si Tionson ang taga-Iloilo City apang masobra 30 ka tuig na nga nagatudlo sa Gemumua-Agahon kag didto naman nag-istar matapos nga nakabakal sang balay.

Oktubre 15 sang aga, nasapwan ang bangkay ni Tionson nga hublas, nabaklid kag nahigtan sang kurtina ang mga kamot, nabusalan sang bra ang baba kag may pilas sang pagkabuno sa likod kag pagkalampos sa ulo.

Nadakpan kag napasakaan na sang kaso si June Aguilar, 45 nga tumandok sang Gemumua-Agahon, matapos nag-ako nga ginhimuslan kag ginpatay sini ang maestra. Kaso nga rape with homicide, robbery, illegal possession of firearms kag possession of illegal drugs ang ginpasaka kay Aguilar bangud nakuhaan ini sang pusil kag sachet sang suspected shabu sang nadakpan. (AGB)