PDEA 6, nag-ako nga may drug group sa gihapon sa syudad kag probinsya

Iloilo City — Ginkunfirmar ni PDEA 6 Spokesperson David Garcia nga may drug group sa gihapon nga naga-operate sa syudad kag probinsya sang Iloilo.

Wala gintuad ni Garcia kun pila ka drug groups ang naga-operate sa syudad kag probinsya apang ginpahayag separado ini nga grupo sa nabungkag na nga Odicta kag Prevendido drug groups.

Gina-imbestigaran man sang PDEA ang posible pagtingub bilang grupo sang mga remnants sang Odicta kag Prevendido drug groups.

Matandaan, ginpahayag ni former PDEA 6 Director Wardley Getalla nga naglab-ot sa 18 ang mga drug groups sa rehiyon.

Indi magnubo sa lima naman ka mga drug groups ang naga-operate sa syudad kag probinsya suno kay Getalla kag nalakip diri ang Odicta kag Prevendido drug groups.

‘IBAN PA’

Magluwas sa mga remnants ukon nabilin nga mga miembro sang Prevendido kag Odicta Drug Groups, ginamonitor man sang PDEA 6 ang mga remnants sang iban nga mga drug groups angut sa illegal drug trade.

Dugang niya, may mga drug groups man halin sa Negros nga nagapasa man sang supply sang illegal drugs sa Panay.

‘WALA PA SANG TUL-ID NGA SABAT’

Wala pa sang tul-id nga sabat ang PDEA 6 kun namonitor man nila ang ginpahayag pagbulos sang daan nga drug group sa syudad sa drug operations sa rehiyon matapos nabungkag ang Odicta kag Prevendido drug groups.

Suno kay Garcia, wala pa siya sang datus angut diri apang nagpasalig nga mahatag sang pahayag.

Una na ginpahayag ni Police Senior Inspector Kennith Bermejo, team leader sang Regional Drug Enforcement Unit nga posible ginbuslan sang daan na nga drug group sa syudad ang drug operations sa rehiyon matapos nabungkag ang Odicta kag Prevendido drug groups. (JoMaque)