Mayor Joe Espinosa, ginpadal-an sang sulat sang anum ka konsehal matapos wala naswelduhan ang contractual employees sa ila opisina; Espinosa, nagrason naman nga madamo siya sang trabaho gani wala napirmahan ang mga kontrata

Iloilo City–Nagpadala sang sulat ang anum ka city councilors kay Mayor Joe Espinosa agud hingyuon ini nga pirmahan ang kontrata sang ila contractual employees nga wala pa naswelduhan.

Suno kay Councilor Plaridel Nava, manug-isa ka bulan na nga wala naswelduhan ang mga empleyado sang anum ka konsehal nga identified kay Congressman Jerry Treñas.

Bilang floor leader, ginsapol ni Nava ang anum ka konsehal agud ma-istoryahan ang tikang nga ila himuon.

Ginhatagan nila sang tatlo ka adlaw ang alkalde agud pirmahan ang mga kontrata. Kon mapaslawan si Espinosa, ginpahayag ni Nava nga pasakaan sang mga konsehal sang kaso ang alkalde.

‘Paathag ni Espinosa’

Nagrason si Espinosa nga madamo siya sang trabaho gani wala napirmahan ang mga kontrata sang contractual workers.

Suno sa alkalde, indi man lang pagpirma sang mga kontrata ang iya trabaho. Wala naman sini gintuad kon san-o niya pirmahan ang mga kontrata. (AGB/JV)