(UPDATE) Kontrata para sa sweldo sang staff sang pila ka konsehal sa syudad, napirmahan na ni Mayor Joe Espinosa

Iloilo City–Wala nadayon sang nagligad nga semana ang pagpadala ang sulat sang city council kay Mayor Joe Espinosa agud hingyu-on ini nga pirmahan ang kontrata agud makasweldo ang mga staff sang anum ka konsehal nga identified kay Congressman Jerry Treñas.

Suno kay Councilor Plaridel Nava, nakita sang alkalde nga indi pabor sa iya ang public opinion angut sa iya ginhimo matapos siya gin-interview gani gin-release sini ang mga kontrata sang pila ka konsehal.

Nagkadtu pa sa opisina ni Nava ang staff sang mga konsehal kag nagpahibalo nga nabaton na nila ang kontrata.

Kaina sang hapon naman, Oktubre 29, ginpirmahan na ni Espinosa ang kontrata para sa mga staff ni Liga President kag ex-officio Councilor Irene Ong. Una na nga nagsulat si Ong sa alkalde bangud 10 sa 22 ka staff sini ang wala maswelduhan. (AGB/JV)