(UPDATE) Bana sa Guimaras, desidido nga bulagan ang iya asawa matapos siya ginpungkoy sang cellphone kag napilasan; utod sang asawa, nagpa-athag nga ginpungkoy sang iya manghod ang biktima bangud hubog nga nagpauli kag wala nagasabat sa text message nga ginpadala

Guimaras–Desidido ang bana sa isa ka barangay sa banwa sang Buenavista nga makigbulag sa iya asawa matapos siya ginpungkoy sang cellphone sang nagpauli siya sang Oktubre 28 sang gab-i.

Suno kay alyas Toto, 23-anyos, nakapoy na siya sa ila sitwasyon sa diin masami siya ginasakit sang iya asawa.

Gin-ako ni Roto nga naakig ang iya asawa sang nagab-ihan siya sa pagpapuli sang Domingo sang gab-i kag nakainom pa matapos niya gin-updan nga magpa-tattoo ang iya abyan. Nagpadulong sa police station ang bana matapos siya napilasan sa idalum sang mata sang ginhaboy sang cellphone sang iya asawa.

Ginpapreso ni Toto ang asawa halin Dominggo sang gab-i tubtub Lunes sang udto.

Gin-ako man ni Toto nga isa ka bulan na siya nga wala sang trabaho pero nagatinguha man nga magpangita sang obra.

Ginpanghiwala naman ni alyas Che, magulang sang asawa sang biktima nga si Inday gina-maltratar sini ang iya bana. Suno kay Che, na-impito lang ang iya manghod sang gab-i na nga nagpauli si Toto kag naka-inom pa.

Sabado sang gab-i suno sa iya, naayawan na kapangita ang asawa sa iya bana. Wala man ini nagasabat sa text message sang iya asawa tubtub nahibaluan nga nag-upod ini sa iya barkada.

Sang Oktubre 28, ginsulit ni Toto ang pag-inom inom kabangdanan pagpuli sini pagkagab-i, ginpungkoy siya sang cellphone sang iya asawa.

Nagpauli sa iya ginikanan ang asawa samtang nagatiner naman sa iya tiya si Toto pagkatapos sang natabu. (AGB)