Welder nga naghimo sang bomb joke sa Dumangas port kag nakuhaan pa sang suspected illegal drugs, ginpasakaan na sang kaso
Dumangas, Iloilo — Ginpasakaan na sang kaso nga paglapas sa PD 1727 (DECLARING AS UNLAWFUL THE MALICIOUS DISSEMINATION OF FALSE INFORMATION OF THE WILLFUL MAKING OF ANY THREAT CONCERNING BOMBS, EXPLOSIVES OR ANY SIMILAR DEVICE OR MEANS OF DESTRUCTION AND IMPOSING PENALTIES THEREFORE) kag RA 9165 ukon Comprehensive Dangerous Drugs Act of 2002 si Luisito Monares, 46 kag residente sang Barangay Singcang, Bacolod City.
Ini matapos nga naglango-lango nga ‘daw bomba’ kabug-at ang iya bag kag ginpahayag nakuhaan sang suspected drugs sang ginrikisa sang mga pulis.
Suno kay PO2 Terrence Suria, imbestigador sang Dumangas Police Station, ginpasaka na nila ang kaso sa provincial prosecutors office kaina sang hapon, Oktubre 29.
Ginklaro ni Suria nga gindakop si Monares sang lady guard nga si Yvette Gay Magno sang Dumangas Port matapos naglango-lango nga may unod nga bomba ang dala niya nga bag samtang nagapasulod sa puerto. Gindala siya ni Magno kay Petty Officer 3 Rolly Ismael sang Philippine Coast Guard kag gindala si Monares sa Dumangas Police Station.
Nagpanindugan pa si Suria nga yara man ang guard kag coast guard sang ginrikisa si Monares antes ginsulod sa presuhan. Sang ginpauba na ini sang iya sapatos, didto kag na-recover sa tuo niya nga sapatos ang duha ka sachets sang suspected shabu.
Ginpa-idalom naman sa drug test si Monares agud mahibaluan kun ini ang naga-gamit sang illegal nga droga.
Hugot naman nga ginapanginwala sang subject nga iya ang nakuha nga suspected drugs. Suno kay Monares, ‘planted’ ang illegal drugs. (JoMaque)