Fuel subsidy sang Sara police station, wala na-proseso sang Sara LGU – PSI Ortizo

Sara, Iloilo – Gin-confirm ni PSI Ascension Ortizo, hepe sang Sara MPS, nga wala na sila ginpasugtan nga magkuha sang gatong sang gasoline station sa banwa bangud wala pa na-proseso sang local government unit ang balayran sa fuel subsidy.

Suno kay Ortizo, nagalab-ut sa P60,000 ukon tatlo ka bulan nga balor sang gatong ang wala nabayran sang LGU. Ginpahayag sang taga-munisipyo nga posible mabayran sa masunod nga semana ang gatong kon mag-abot ang municipal treasurer halin sa iya ginkadtuan.

Gin-ako ni Ortizo nga daku ang bulig sang fuel subsidy sang banwa para sa ila adlaw-adlaw nga paglibot kag mga hilikuton.

Sa subong suno kay Ortizo, nagagasto sila halin sa ila bulsa kag may mga private individuals nga nagahatag sang bulig agud makapatughong sila sang patrol cars. (JoMaque)