Mga pasahero nga mapauli para sa pista minatay, amat-amat na nga nagadugok sa mga transport terminals

Iloilo City–Nagsugod na ang paginutok sang mga pasahero sa mga transport terminals.

Sa pag-obserbar sang Aksyon Radyo, nagapila na ang mga pasahero nga mapauli sa kabanwahanan kag iban nga probinsya para sa long weekend bangud sa All Saints’ Day buwas kag All Souls Day sa Nobyembre 2.

Gindeklarar sang Malacañang nga holiday ang duha ka selebrasyon. Ginsuspender naman sang palasyo ang trabaho sa mga opisina sang gobyerno sa bug-os nga pungsod halin alas-3 kaina sang hapon, Oktubre 31, agud temprano nga makapauli ang mga empleyado.

Ginpasiguro sang nagkalain-lain nga transport groups nga indi pagkulangon ang mga salakyan para sa mga luyag magbisita sa ila mga minatay kag magabakasyon.

Nakaplastar na ang mga assistance desks sa mga transport terminals, seaports, airport, mga patyo kag iban pa nga matawo nga lugar agud masiguro ang malinong kag matawhay nga pag-obserbar sang pista minatay. (AGB)