Sa Pototan, L300 van nga nakasagaid sang menor-de-edad kag nakita nga may unod nga patay, natukiban nga funeral service

Pototan, Iloilo–Nagasgasan ang menor-de-edad nga nagabisikleta sa kilid sang karsada sang nasagairan sang L300 van sa Barangay Purog, Pototan pasado alas-11 kaina sang aga, Oktubre 31.

Suno kay PO2 Cris Latoza sang Pototan Police Station, luwas naman si alyas Jay, 11 anyos.

Nagpalagyo ang sakay sang vanpagkatapos sang insidente kag sang ginbuksan ang salakyan, nakita nga may bangkay sa sulod. Ginpa-athag ni PO2 Latoza nga funeral service ang van kag nagkuha sang bangkay sa Pototan Provincial Hospital kag idul-ong sa Mina.

Posible suno kay Latoza nga nalagyo ang driver sang van, iya helper kag himata sang patay bangud nakulbaan nga makastiguhan sila. Indi kitaun ang na-laminate nga pangalan sang punerarya bangud nabutang ini sa sulod sang salakyan. (AGB)