Wala sang daku nga rerouting sa mga dalan malapit sa sementeryo kadungan sang fiesta minatay suno sa PSTMO head; 300 ka personnel gin-deploy sang PSTMO

Iloilo City – Wala sang major rerouting sa mga dalan malapit sa mga publiko kag pribado nga sementeryo sa siyudad kadungan sang fiesta minatay.

Suno kay Public Safety and Transportation Management Office ukon PSTMO Head Jeck Conlu, mangin one-way ang dalan sa mga dalagku nga sementeryo partikular sa Lapaz kag Mandurriao agud malikawan ang pagpugok sang trapiko.

Ipatuman sang PSTMO nga pagdumili sa pag-parking sang mga salakyan, 100 meters halin sa entrance kag exit sang kada sementeryo sa siyudad. May gintumod nga parking area ang PSTMO para sa mga salakyan apang ‘first come, first serve’ basis.

Ginpasiguro man ni Conlu nga may mga tawo sila nga i-deploy agud maggiya sa mga may dala nga salakyan. Hawanan man sang PSTMO ang mga obstruction sa dalan malapit sa sementeryo lakip na diri ang mga nagabaligya sang bulak kag kandila.

Nagpangayo man sang traffic scheme ang PSTMO halin sa tagdumalahan sang mga private cemeteries.

Samtang, 300 ka mga personnel ang gin-deploy sang PSTMO sugod subong nga adlaw, Oktubre 30. Magaduty ang mga ini sang 24 oras kag sila ang magasaway sa mga nagasablag sa dalan kag mabulig sa pagbantay kun may mga nagalapas sa kasuguan pareho sang pagdala sang mga bladed weapons kag makahulubog nga ilimnon. (JoMaque)